Twee produksieveilings

Prestasiegetoetste veldmerinoramme, asook stoet- en kudde-ooie word jaarliks op twee produksieveilings te koop aangebied. Dit vind plaas op:

• die derde Donderdag in Februarie, en
• die eerste Donderdag in September.

Besigtiging van die ramme is vanaf 16:00 op die dag voor die veiling en vanaf 08:00 op die dag van die veiling. Phil van der Merwe, stoetraadgewer, draf elke ram se wol- en bouvorm-eienskappe saam met belangstellendes deur. Hy klasseer die ramme as stoet-, kudde- of “selected”-ramme om voornemende kopers in hul keuses te help.

Die veilings lok kopers landswyd. Hulle kom van sover as Riviersonderend en Uitenhage in die suide, Barkley-Oos en Stutterheim in die ooste, Calvinia en Sutherland in die weste, Vrede in die noorde en veral uit die Vrystaat om in die Merino-lekkerte te deel.

Getuigskrifte

"Dit is die beste veiling wat ek nog ooit bygewoon het. Konsortium-Merino se produk, bemarking, en passie het my beïndruk. In Australie, Nieu-Seeland en Suid-Afrika kan niemand by hulle genetika kersvashou nie. Konsortium-genetika kan vir die Merino, as 'n ras, van groot waarde wees - want met die tipe is daar geen rede vir kruisteling nie."   Ian Walsh, FalKirk wetenskaplike stigting, Nieu-Seeland (2006)

 "Hierdie is nie 'n veiling waarvan jy iemand bloot net kan vertel nie. Boere moet kom om dit te beleef."   Piet Barnhoorn, Noodhulp, Middelburg (2006)

 “Eintlik beskryf die woord veiling nie hierdie geleentheid nie. Dit is voorwaar ‘n Merino-extravaganza wat menige besoeker ‘n ware “under the skin” Merino-gevoel gee. Só sal die Merino as vlagskip van ons kleinveebedryf seëvier. Die besondere diepte en gehalte in u aanbieding is opvallend en word met volledige prestasiedata professioneel aangebied.”   Jacobus le Roux, voormalige rasdirekteur, Merino SA (2002)

 “Dit is ‘n aanbieding waarop die SA wolbedryf trots kan wees.”   Jimmy Maritz, voormalige bestuurder openbare betrekkinge, BKB (2003) 

Marlow & Konsortium

Die Hoër Landbouskool Marlow, naby Cradock, bied op 22 Februarie 2008 sy tweede Konsortium-Merinoveiling aan. Sowat 60 ramme, Konsortium-nageslag van die skool se Merinokudde, en suiwer geteelde Konsortium-ramme, sal om 12:00 by Marlow se klubhuis opgeveil word. Besigtiging is vanaf 09:00 op die dag van die veiling. Die eerste tree oppad na díe Merinoveiling is reeds in April 2006 gegee, toe Marlow se hele kudde van sowat 500 ooie met die saad van agt Konsortium-stoetramme geKI is.

Poenskop-veilings

Die Triton Poenskop-Merinoveilings word jaarliks twee keer aangebied. Hulle vind plaas:

• by Boontjieskraal, naby Caledon, op die vierde Donderdag in Januarie; en
• op Bloemfontein se skougronde, op die tweede Donderdag in Augustus.

Vir meer inligting klik op Poenkop-Merino's.